नेपाल आज जिम्वावेबिरुध खेल्दै !

नेपालले त्रिकोणात्मक सिरिज अन्तर्गत आफ्नो तेस्रो खेलमा मंगलबार टेष्ट टोली जिम्बावेसँग खेल्ने छ । खेल नेपाली समय अनुसार साँझ ५ः१५ बजे सुरु हुनेछ ।

पहिलो खेलमा नेपाल जिम्बावेसँग ५ विकेटले पराजित भएको थियो । जित नजिक पुगेको नेपाल डेर्थ ओभरमा बलिङ कमजोर हुँदा पराजित हुनु परेको थियो । एक समय १० ओभरमा ६४-५ को कमजोर अवस्थामा पुगेको जिम्बावेलाई छैटौं विकेटका लागि रेयान बर्ल र रिचमन्ड मुतुम्बामीले ६९ रनको अविजित साझेदारी गर्दै जित दिलाएका थिए । नेपालले दोस्रो खेलमा सिंगापुरलाई ९ विकेटले हराएको थियो । तेस्रो खेलमा जिम्बावे सिंगापुरसँग ४ रनले स्तब्ध हुन पुग्यो ।

दुबै खेलको प्रर्दशनले नेपालको मनोबल उच्च छ । जिम्बावेविरुद्ध पहिला ब्याटिङ गर्दै नेपालले २० ओभरमा ६ विकेटको क्षतिमा १ सय ३२ रन बनाएको थियो । जिम्बावेले १८.१ ओभरमा ५ विकेट गुमाउँदै पुरा गरेको थियो । लेग स्पिनर सन्दीप लामिछानेले सुरुवाती तीन ब्याट्सम्यानलाई शून्यमा पेभिलिएन फर्काएपनि अन्य बलरको साथ नपाउदा इतिहास रच्नबाट चुकेको थियो ।

दोस्रो खेलमा सिंगापुरले प्रस्तुत गरेको १ सय ५२ रनको लक्ष्य नेपालले २४ बल अगाडी १ विकेट क्षतिमा पुरा गर्दै कीर्तिमान कायम गरेको थियो । कप्तान पारस खड्काले ५२ बलमा ९ छक्का र ७ चौका सहित १ सय ६ रनमा अविजित रहँदै इतिहास रचेका थिए । पारस टि२० मा शतक प्रहार गर्ने नेपालका पहिला खेलाडी हुन् । त्यस्तै लक्ष्य पछ्याउने क्रममा शतक प्रहार गर्ने पारस विश्वकै पहिलो कप्तान पर्दछन् ।

सिंगापुरसँगको खेलमा पारस र आरिफ शेखले दोस्रो विकेटका लागि अविजित १ सय ४५ रनको साझेदारी गरेका थिए । जुन हाल सम्मकै टि२० मा नेपालले गरेको उच्च साझेदारी हो । ओपनिङ फेरि पनि निराशजनक छ । बायाँ हाते ब्याट्सम्यान इशान पाण्डे दुबै खेलमा खराब प्रर्दशन गरेका छन् । जिम्बावेविरुद्ध ४ र सिंगापुरविरुद्ध ५ रनमा आउट भएका थिए । उनको स्थानमा पवन सरार्फले मौका पाउन सक्छन् । पारसले इशानलाई पुन विश्वास गर्न सक्ने संभावना पनि रहन्छ । तीब्र गतिका बलर सोमपाल कामी पनि दुबै खेलमा विकेट बिहीन छन् । अभिनाष बोहोराले कसिलो बलिङ गरेपनि दुबै खेलमा विकेट लिन सकेनन् ।

त्रिकोणात्मक सिरिजमा पहिलो चरणको ३ खेल सकिंदा नेपाल शीर्ष स्थानमा छ । तीन टोलीको समान २ अंक भएपनि नेट रन रेटका आधारमा नेपाल शीर्ष स्थानमा रहेको हो । शीर्षस्थान कायमै राख्न नेपाललाई जित्नै पर्ने हुन्छ । नेपालले जिम्बावेलाई हराउन सके उपाधि जित्ने संभावना बलियो बन्ने छ । यता नेपाली सिनियर टोलीले वान डे र टि२० आई दुबैमा टेष्ट टोलीलाई हराउन सकेको छैन । पछिल्लो समय निरन्तर कमजोर प्रर्दशन गर्दै आएको जिम्बाबेलाई हराउँदै इतिहास रच्ने अवसर नेपाल सामु छ ।

पारसको लयलाई रोक्न जिम्बावेका खेलाडीलाई कठिन पर्ने देखिन्छ । जिम्बावेको पछिल्लो समयको प्रर्दशन हेर्दा कठिन देखिदैन । जिम्बावे सिंगापुरसँग ४ रनले स्तब्ध भएको थियो । जिम्बावेको बलिङ कमजोर देखिएको छ । सिंगापुर विरुद्ध कप्तान सन विलियम्सले ६६ रनको इनिङका बाबजुद पनि पराजित भएको थियो । रेयान बर्लले राम्रो प्रर्दशन गरेका छन् । सरकारी हस्तक्षेपको कारण देखाउँदै आईसीसीले दुबै देशको बोर्डलाई निलम्बन गरेको थियो । नेपालको निलम्बन फुकुवाको संघारमा छ । आगमी अक्टोर १३ मा बस्ने आईसीसीको बोर्ड बैठकले फुकुवा गर्ने आशा राखिएको छ ।

अक्टोर १८ देखी नोभेम्बर २ सम्म यूएईमा हुने ग्लोबल टि ट्वान्टी विश्वकप छनोट अघि तयारी स्वरुप सिंगापुरले त्रिकोणात्मक सिरिजको आयोजना गरेको हो । नेपाल अघिल्लो महिना सिंगापुरमै आईसीसी टि ट्वान्टी एसिया विश्वकप छनोटमा खराब प्रर्दशन गर्दै बाहिरिएको थियो । यस सिरिजलाई त्यहि हारको पिडा बिर्साउने र आफ्नो मैदानमा असली स्तर देखाउने अवसरका रुपमा लिईएको छ ।

Comments

Leave a Reply

Your email address will not be published. Required fields are marked *